2Cor 5 | MHL | STEP | Aria i amisaremik, i mia aakisa ikemik fain koora saarik awonariya, naeya teneya iirarimik. I umemkun wiimar Mua Maneka-ke yia iikirowami mia sira onaiya yiinon. Mia nain me koora saarik mua-ke sirarikuan, weetak. Mia eena owow iinan-pa anane ikowa nain.

2 Corinthians 5

Owow iinan-pa ikowa

1 Aria i amisaremik, i mia aakisa ikemik fain koora saarik awonariya, naeya teneya iirarimik. I umemkun wiimar Mua Maneka-ke yia iikirowami mia sira onaiya yiinon. Mia nain me koora saarik mua-ke sirarikuan, weetak. Mia eena owow iinan-pa anane ikowa nain. 2 Mua Maneka owow iinan mia yia wuomiya nain i mia sira onaiya ikaiyen. Ne saporma ikowa saarik me ikaiyen, weetak. Naapeya i aakisa miiw mia fain onaiya ikok kema fuinem-ikaimik. Kema wiisarep maimik, “I mia oko aawowa nain ewurarekak oo,” naap maimik. 4 I aakisa miiw fain mia ikok yoowa furewap kema fuinem-ikaimik. Nain i me mia fain piipuowa naep maimik, weetak. Miiw fain mia feekiya ikok mia sira enuma aawiyen naimik. Naeya mia fain yiar kirep-pueya mia enuma aawep anane ikaiyen nain naep maimik. 5 Ne Mua Maneka ona wi naap ikauk naep yia tawerarek. Ne mia enuma maek nain wiimar makena wia opominen naep Ewar Eliwa ilenow maa saarik sesekeya yiamiya ikaiya.

6 Naapeya i kekanimik. Ne maimik, makena, i aakisa miiw fain mia ikok yiena Maneka epa ikaiya neeke me ikemik. 7 O maa mauwa maek nain yiena mokoka-pa me urufimik, nain maa maek nain opora wiar opimik. 8 I umep mia fain piipuap owow iinan mia aawep yiena Maneka wameiya ikowa nain manek akena kookalimik nain i opora wiar opap kekanep ikaimik. 9 Naapeya kema maneka feenap wuimik, i mokok enuma ikok Mua Maneka kookaliya naap kakeniw onamkun yia kemelinok naep. Ne ikoka owow iinan-pa ikowa pun naap oniyen. 10 Moram i wiimar Krais miira-pa yiam fiirimemkun os-ke yia mekawinon. I eena mokok enuma-pa ikemik nain sira eliwa-pa ikemik-i e samora-pa ikemik, sira nain. Mua kuisow kuisow ona sira kamenap ikua nain kakeniw naap wia kiripominon.

Yeesus opora opap Mua Maneka wameiya-pa ikemik

11 Aria i nain naep yiena Maneka keker opimik. Naapeya wi mua o opora wiar opuk naep wia maakowa sisewarimik. I uuwimik fain sira ne kema Mua Maneka baliwep yiar amisarek. Ne nis pun naap baliwep yiar amisareka naep nia maiyem. 12 I opora kiiriw nia maakimik fain me ni sira eliwa-ke yia naeka naep kema nia mikimik, weetak. Ni i sira muuta nain yiar kemelap palaneka naep opor unowa nia maakimik. Wi mua mia muutiw wia urufimik nain sira me wiar urufimik, wi mua naap nain ni eliw opora wia fienami wia kiripowen, nain naep nia maakimik. 13 I mua momora-ke yia naiman-i? Nain i Mua Maneka uuwow muuta nain naap onimik. “Wi maa kema suuwap aakunimik,” naap yia naiman-i? Nain i nia asipu naep naap onimik. 14 Krais manek akena yia kookalek, mua kuisow nain-ke i mua unowa epa yiar aawep umok. Naeya o umok nain i unowiya umowa saarik aremi sira eena onam-ikemik nain piipuimik. Naapeya i nain makena-ke naep, nain kema manekiw ikok uuwimik. 15 Krais i yia naep umok. Ne pun umep ikok iikirak. Naeya i yiena maa kema manekiw me ikaiyen, o kema manekiw ikok uuwam-ikaiyen.

16 I iiriw wi mua unumiya nain wia urufap wia kookalep wia aawem-ikemik. Ne aakisa Krais naep i sira nain me onimik. Makena, iiriw i Krais miiw fain mua-ke naep maem-ikemik. Ne aakisa naap me maimik. 17 Naapeya mua eena Krais teeria wiar ekap epaskun arek nain mua enuma arek. Kema suuwowa awona iiriw wiar mesenalek, ne enuma-ke epa aawok. 18 Sira unowa nain Mua Maneka ona imenak. Iiriw o iiwuarem-ikemkun Krais-ke yia aaweya aakisa Mua Maneka wameiya epaskun ikemik. Ne uuwowa fain yiek, Yeesus opora wia maakemkun o wameiya epaskun ikauk naep. 19 Opora feenap, Mua Maneka-ke Krais sesekak. Naeya wi mua unowa o iiwuarem-ikemik nain ona wia aaweya wameiya kema kuisow ikemik. O pina onam-ikemik nain me wia kiripomami opora iiwawun ifakimok. Naapeya ona uuwowa nain yieya o wameiya kema eliwiw ikow opora nain wia maakem-miawimik. 20 Naeya Mua Maneka yia sesekeya Krais opora wiar pikiwemi ni nia maakimik. Ni Mua Maneka eena mikikira iweman nain i Krais unuma-pa feenap nia maakimik, ni Mua Maneka nia aawep ona wameiya-pa nia wuowa iiriw maek. Naapeya o wiar ekeka. Ni kema kireka. Ne o nia aawep ona kemena-pa nia wuinon. 21 Ni kema-ko suuweka, Krais pina marew, nain Mua Maneka-ke i pina nain o mia-pa wiar wuak. Naeya o pina mua arek. Muut nain Mua Maneka-ke i mua kaken eliwa yia naek, ona ikua naap.